Clara Bilbao

Aurrera jarraitzen dugu material plastiko konplexuen zikloa ixteko birziklapen kimikoko teknologiak garatuz

by Leave a Comment

NEOPLAST 2 proiektuak birziklapen kimikoko teknologiak erabiliz plastiko konplexuen hondakinetatik kalitatezko produktuak lortzeko prozedurak zehazten ditu.

Joan den martxoan GAIKER Zentro Teknologikoak zuzendutako NEOPLAST 2 proiektua amaitu zen. GAIKER Basque Research & Technology Alliance, BRTAko kide da.

NEOPLAST 2 proiektua 2023an hasi zen eta bere helburua hainbat hondakin plastiko kalitate handiko baliabide bihurtzen lagunduko zuten birziklatze kimikoko prozesuak garatzeko, hobetzeko eta egokitzeko ikertzea zen, baliabide horiek bigarren mailako lehengai zorrotzenen merkatuek eskatzen dituzten zehaztapenak bete zitzaten. Kontua zen ezagutza sortzea, industria sareak plastikozko materialen erabilera hobea, jasangarriagoa eta zirkularragoa egiteko ezagutza eta teknologia izan zitzan.

Amaierara iritsita, proiektuak proposatutako helburua lortu du. Gaur egun zabortegira bidaltzen diren plastiko konplexuen hondakin-korronteetatik abiatuta, birziklapen kimikoaren bidez, plastiko, kimika eta fintze industrietako ekoizpen-zikloetan berriro sartzeko behar den kalitatea duten produktuak garatzeko prozedurak arrakastaz definitu ditu.

Lortutako emaitzen artean, honako hauek nabarmendu behar dira:

• Solbolisi eta produktuen garbiketa prozesuak batera erabiltzea, poliester eta poliuretano berriak fabrikatzeko momeroak eta aitzindariak lortzeko.
• Pirolisi eta bereizketa prozesuak erabiltzea, poliolefina berriak eta material adsorbatzaileak fabrikatzeko hidrokarburo frakzioak lortzeko.
• Bi etapatako gasifikazio prozesuak garatzea, hondakin plastikoetatik hidrogeno gasa sortzeko
• Prozesatzeko bide berriak irekitzea, hala nola mikroorganismoak edo entzimak erabiltzen dituen biobirziklapena.
• Prozesu berriak gaur egun ia birziklatzen ez diren hondakin plastikoekin erabiltzen hastea, esaterako konposite termoegonkorrekin.

Bestalde, bizi-zikloaren analisiaren bidez, garatutako birziklapen kimiko prozesu berriek ingurumenera ekartzen duten hobekuntza egiaztatu ahal izan da. Gaur egun plastiko konplexuen hondakinak botatzeak pertsonengan eta ingurune naturalean dituen eragin kaltegarriak murriztu direla baieztatu da.

NEOPLAST 2 proiektua Eusko Jaurlaritzak finantzatu du, Elkarlanean egindako ikerketarako ELKARTEK laguntza-programarekin (KK-2023/00060 espedientea). GAIKER zentro teknologikoa koordinatzailea izan da, eta beste lau euskal eragile teknologikok parte hartu dute proiektuan: EHUko Ingeniaritza Kimiko departamentua, EHUko Ingeniaritza Kimiko eta Ingurumen departamentua, Tecnalia eta Polymat. Horiei guztiei esker, arrakasta lortu izan da eta EAEko ehun industrialak hondakinak tratatzeko eta baliozko produktuak sortzeko birziklapen kimikoko teknologiak erabiliz material plastikoen zikloak itxi ahal izango ditu.

Eusko Jaurlaritzak diruz lagundua

Mikroorganismoen biofaktoriak

by Leave a Comment

Mikroorganismoak biofaktoria gisa erabiltzen ditu GAIKERek, intereseko konposatuak modu jasangarrian eta eraginkorrean ekoizteko eta degradatzeko duten gaitasun naturala aprobetxatuz.

Mikroorganismoak ekoizpen- eta bioerremediatze-plataforma bihurtzen ditugu, hainbat erabileratarako; besteak beste, osagai funtzionalak, kosmetikoak, bioerregaiak, bioplastikoak, entzimak eta produktu kimikoak. Horrek guztiak ekonomia zirkularra sustatzen laguntzen du.

30 urtetik gorako esperientziarekin, GAIKERek soluzio pertsonalizatuak diseinatzen ditu enpresen jasangarritasuna eta lehiakortasuna maximizatzeko, eta industria-prozesuak etorkizun garbiago eta eraginkorrago baterantz eraldatzen dituen ikuspegi berritzaile eta ekologikoa eskaintzen du.

Gehiago jakin nahi duzu? Jarri gurekin harremanetan

Cosmetotest-en egongo gara

by Leave a Comment

Maiatzaren 14 eta 15ean GAIKER, Basque Research & Technology Alliance (BRTA) elkarteko kidea, Lyongo (Frantzia) ENS Jacques Monoden ospatuko den Cosmetotest laugarren edizioan parte hartuko du.

Zentro teknologikoak dermokosmetikaren arloko I+G+B zerbitzuen eskaintza aurkeztuko du Goya Análisis doktorearekin eta Anmar Clinical Servicesekin partekatutako stand batean. Era berean, lehenengo egunean, Exposome & pollution (skin, scalp & hair) saioan parte hartuko du, "Comprehensive Exposome Assessment in Skin, Scalp, and Hair: Advanced Methodologies for Developing Personalized Solutions" hitzaldia aurkeztuz.

Cosmetotest bilera Cosmet'in Lyonek eta Skinobsek 2021ean sortu zuten, eta kosmetikoen eta dermokosmetikoen saiakuntza aurrekliniko eta klinikoei buruzko Nazioarteko Sinposioa da. Mundu osoko zientzialariak ekitaldi honetan biltzen dira saiakuntza kosmetikoen berrikuntzak eta joerak aztertzeko.

Gehiago jakiteko

 

GAIKERek beira- eta karbono-zuntzez egindako konpositeetarako konponbide zirkularrak garatu ditu

by Leave a Comment

  • Hiru urteko ikerketa ondoren Europako MC4 proiektua amaitu da eta emaitza onak lortu ditu.
  • Azken bilera GAIKER zentro teknologikoan izan da.

Martxoaren 25 eta 26an, Europako Batzordeak finantzatzen duen (HORIZON-CL4-2021-RESILIENCE-01 deialdia) Europako MC4, Multi-level Circular Process Chain for Carbon and Glass Fibre Composites proiektuaren azken bilera eta erakusketa egin zen.

Bilera Basque Research & Technology Alliance (BRTA) erakundeko kide den GAIKER Zentro Teknologikoan egin zen, eta bertan PROFACTOR GmbH (Austria) koordinatzailea, proiektuko gainerako kide guztiak, eta Europako Batzordeak izendatutako Project Officer eta Project Advisor ere egon ziren.

MC4 proiektua 2022ko apirilean hasi zen, karbono- eta beira-zuntzez indartutako konpositeen birziklapenaren arazorako epe labur eta ertainean irtenbide teknologikoak bilatzeko. Ikerketak erronka hauetarako konponbideak bilatzen zituen: dituzten ezaugarri onak direla eta, zuntzez indartutako plastikoen (FRP) kontsumo handia; ingurumeneko eragina murrizteko material birziklatuen eskaera gero eta handiagoa; eta zabortegian uzteaz gain, konpositeen hondakinak kudeatzeko bestelako bideak aurkitzea.

Hiru urteko lana ondoren, MC4 amaierara iritsi da emaitza onak lortuz. Dagoeneko merkatuan dauden karbono-zuntzez indartutako plastikoen (CFRP) balio-bizitzaren amaieran sortzen diren hondakin onduei eta piezei aplika dakiekeen prozesu kimiko batean oinarritutako birziklatze-alternatiba ikertu du. Ikerketa horren ondorioz, CFRPen solbolisi-prozesua laborategi-eskalan garatu da, erretxinaren hidrolisi azidoko prozesua egiteko ingurune eta baldintza egokiak hautatuz, eta horrela konpositetik abiatuta karbono-zuntz birziklatuak (rCFs) sortzeko. Era berean, laborategiko emaitzek oinarri gisa balio izan dute CFRP hondakinen solbolisirako planta pilotu funtzional bat eraikitzeko. Bertan dagoen 300 litroko erreaktorearen bidez, prozesua frogatu da, eta CFRP produktu berrietan sartu diren rCFs garbiak sortu dira. Instalazio pilotu horri esker, prozesu hori maila industrialean egin ahal dela ondorioztatu da, eta horrek konponbidea eman diezaioke automobilgintza, ontzigintza, aeronautika, kirol-ekipamendu eta hiri-altzarien sektoreetatik datozen beira- eta karbono-zuntzez indartutako konpositeen hondakinen kudeaketari.

Beraz, proiektuaren helburu nagusia bete da, eta karbono- eta beira-zuntzezko konpositeetarako hainbat irtenbide zirkular garatu dira.

Ekonomia zirkularrari eta konposite materialei buruzko jardunaldia

MC4 proiektuaren azken bilerarekin bat eginez, GAIKER Zentro Teknologikoak eta ACLIMAk (Basque Environment Cluster) "Ekonomia zirkularra konposite materialen arloan" jardunaldia antolatu zuten martxoaren 27an. Bertan, MC4 proiektuaren emaitzak aurkeztu ziren eta baita horiek automobilgintzan, ontzigintzan, aeronautikan, kirol-ekipamenduan eta hiri-altzarietan dituzten erabilerak ere.

Jardunaldia Waste Lab Bizkaia (Derio) zentroan egin zen eta oso harrera ona izan zuen.

Proiektuari buruzko informazio gehiago: https://www.mc4-project.eu/

Proiektu honek Europako Batzordearen HORIZON ikerketa- eta garapen-programaren finantzaketa jaso du, 101057394 zenbakidun kontratuaren pean.

In-Cosmetics Globalen

by Leave a Comment

Apirilaren 8tik 10era In-Cosmetics Global 2025 izango da Amsterdamen.

Aurten ere, GAIKERek, Basque Research & Technology Alliance (BRTA) erakundeko kide, parte hartuko du dermokosmetikaren alorrean dituen I+G+B zerbitzuak aurkeztuz. Aurreko urteetan bezala, standean Dr. Goya Análisis eta Anmar Clinical Services enpresak ere egongo dira .  

In-cosmetics Globalek munduko industria kosmetikoa biltzen du berrikuntza bultzatuz, loturak sustatuz eta edertasunaren etorkizuna moldatzen duten ideiak eskainiz. Dudarik gabe, osagai berriak aurkitzeko, joera berriak ezagutzeko eta kontsumitzaileak liluratu eta haien nahiak aseko dituzten formulak egiteko plataforma da.

Zatoz gu ikustera 12D50 standera!

>> Gehiago jakiteko

Optidel Biosystems-ek arrisku-kapitaleko inbertitzaileen babesa jaso du

by Leave a Comment

Optidel Biosystems startupek kosmetika sektorean osagai aurreratuak eta konponbide pertsonalizatuak garatzeko muga berriak irekiko ditu

Eusko Jaurlaritzak Optidel Biosystems, S.L. startupa babestu du Euskadiko Arrisku-kapitalaren Sozietate Kudeatzailearen bidez (SPRI Taldea) eta Basque Tek Ventures ekimenaren bidez (BasketVenture, FCR funtsarekin). Bazkide berri hori bere kapitalean sartuz, enpresak bere ikerketa-gaitasunak indartu eta bere produktuen eskaintza arinago hedatu ahal izango ditu. Lankidetza estrategiko horri esker, Optidel Biosystems-ek berrikuntza teknologikoko liderra izan nahi du kosmetikaren arloan.

Optidel Biosystems 2023an sortu zen GAIKER zentro teknologikoari esker. Bizkaian dago, eta osagai kosmetiko aurreratuak ikertzen eta garatzen aitzindaria da. Polifenolak bezalako aktibo naturalen disolbagarritasuna eta egonkortasuna hobetzeko teknologia berritzaileak erabiltzeko ikuspegi berezia du. Konposatu horiek propietate antioxidatzaile handiak eta larruazalerako zenbait onura dituzte, eta enpresak, patentatutako plataforma teknologiko baten bidez, inork ez bezala aprobetxatzen ditu.

Optidel Biosystems-en konpromisoa kosmetika eraldatzea da, produktuen formulazioa optimizatzen duen abangoardiako teknologien bidez soluzio pertsonalizatuak sortuz. Soluzio horiek sektoreko enpresentzat dira, eta baita ageriko emaitza eraginkorrak bilatzen dituzten kontsumitzaileentzat. Erabiltzen duen teknologia horri esker, osagai aktibo kontzentratuak eskaini ahal ditu enpresak, erabilera topikoko produktuetan duten eraginkortasuna ahalik eta gehien handituz.

Optidel Biosystems-i buruzko informazio gehiago

Optidel Biosystems-ek etengabe hazteko asmoa du, eta berrikuntza eta jasangarritasuna dira bere funtsezko oinarriak. Abangoardiako teknologiak eta azken belaunaldiko metodologia zientifikoak erabiliz, osagai kosmetiko berriak sortzen jarraitu nahi du, bezeroentzat klinikoki eraginkorrak diren emaitzak emateaz gain ingurumena ere errespetatuz.

Datozen urteetarako helburu argiak ditu: irtenbide teknologiko berrien ikerketa eta garapena bultzatzea, eragiketak zabaltzea eta ekoizpen-prozesuen eraginkortasuna hobetzea. Horrela, osagai kosmetiko aurreratuen sorkuntzan mundu mailan erreferente izan nahi du, etorkizun jasangarriagoa lortzeko eta gero eta zorrotzagoa den merkatu baten eskaerei aurrea hartzeko.

Optidel Biosystems-ek Eusko Jaurlaritzaren laguntza du, SPRI Taldearen Basque Tek Venture ekimenaren bidez eta EAEko Arrisku-kapitalaren Sozietate Kudeatzailearen bidez. Basque Research & Technology Alliance (BRTA) partzuergoari atxikitako zentroek sortutako teknologietan oinarritutako enpresa teknologiko berriak (deeptech) sortzen laguntzera eta haietan inbertitzera bideratutako ekimen berria da Basque Tek Ventures.

Ekimenak funts propioa du (BasquetekVenture, FCR), sortutako startup berrietan inbertitzeko. Transferentzia teknologikoko funts horren bidez, potentzial handieneko aktibo teknologikoak identifikatzen eta lehenesten ditu, errendimendu handiko ekipoak sortzen laguntzen du, eta konpainia martxan jartzen eta merkaturatzen laguntzen du.

https://optidelbiosystems.com