Archives for December 2025

INTESCOP proiektuak hondakin plastikoak bereizteko prozesuak hobetuko ditu, kalitatezko frakzioak berreskuratzeko eta bizi amaieran plastikoen zirkulartasuna bultzatzeko.

GAIKER Zentro Teknologikoa, Basque Research & Technology Alliance (BRTA) partzuergoko kidea, hondakin plastiko konplexuen ekonomia zirkularrari buruzko proiektua egiten ari da, analisi espektroskopiko teknika berritzaile bidezko identifikazio adimendunean oinarritua (INTESCOP).

Ikerketa industrial honen helburua denbora errealeko identifikazio-teknologia berriak garatzea da, plastikozko hondakinak euren izaera polimerikoaren arabera modu eraginkorragoan bereizteko. Ikerketak hondakin plastikoak bereizteko ekoindustrian dauden erronka teknologikoei erantzuna emango die.

INTESCOP proiektuan, bi urtez (2025-2027), hondakin plastiko konplexuak automatikoki sailkatzeko sistema berriak diseinatzeko eta garatzeko ezagutza teknologikoa sortuko da. Horretarako, adimen artifiziala eta analisi espektroskopiko teknika aurreratuak erabiliko dira: ikusmen hiperespektrala eta terahertzo espektroskopia.

GAIKER aditua da birziklatze-teknologietan eta hondakinak egokitzeko eta berreskuratzeko prozesuak garatzen eta ebaluatzen, ondoren bigarren mailako lehengai gisa erabiltzeko. Hortaz, ikerketa honetan, ontzi arinen hondakin korronteko geruza anitzeko plastikoak eta plastiko biodegradagarriak, eta tresna elektriko eta elektronikoen hondakin korronteko plastiko teknikoak bereiztu eta sailkatuko dira, euren aztarna espektralak aztertuz. GAIKERek adimen artifizialean oinarritutako ereduak laborategi mailan garatu eta ebaluatuko ditu.

INTESCOP proiektua Bizkaiko Foru Aldundiak finantzatzen du, 2025eko Transferentzia Teknologikorako Programa barruan, eta horren bidez, Bizkaiko ekoindustriak hondakin plastikoak bereizteko erabiltzen dituen prozesuak hobetuko dira. Ondorioz, kalitate handiagoko frakzioak berreskuratuko dira eta ziklo ekonomikoan bigarren mailako lehengai gisa sartzen diren kontsumo osteko plastikoen bolumena handituko da.

Bizkaiko Foru Aldundiak finantzatu du proiektu hau, 2025eko Teknologia Transferentzia Programaren barruan / Este proyecto ha sido financiado por la Diputación Foral de Bizkaia dentro del Programa Transferencia Tecnológica 2025

CICLICOM sektoreko eragileen topagune izango den plataforma digitala eraikitzen ari da.

Basque Research & Technology Alliance (BRTA) elkarteko kide den GAIKER Zentro Teknologikoak zuzentzen du CICLICOM. Material konposatuen eta plastiko konplexuen zirkulartasunerako berrikuntza ekosistema aurrera doa, eta gaur egun sektoreko eragileen topagune izango den plataforma digital bat eraikitzeko fasean dago.

Plataforma horrek hondakin plastikoekin eta horiek tratatzeko behar diren teknologiekin lotutako eskaintza eta eskaria lotzea eta geolokalizatzea erraztuko du, hainbat erakunderen azpiegiturak, zerbitzuak eta gaitasunak bilduz. Helburua negozio aukera berriak sortzea, transferentzia teknologikoa erraztea, eta enpresen, zentro teknologikoen eta erakunde publiko eta pribatuen arteko elkarlana sustatzea da. Era berean, plataforma handitzeko kanpaina bat egiten hasi da, gaitasun eta zerbitzu berriak eman ditzaketen erakunde berriak bertan sartzeko. Hedapen horrekin, soluzio teknologikoen garapena aberastu eta negozio aukera berriak sortu nahi dira.

CICLICOMi buruzko informazio gehiago
CICLICOM 2024an jarri zen martxan, material konposatuen eta plastiko konplexuen arloko eta bizi-ziklo amaieran hondakinak tratatzeko, birziklatzeko eta aprobetxatzeko teknologien arloko ekoizpen sektore nazionaleko funtsezko eragileak biltzeko asmoz. Ekosistema horren bidez, enpresei ezagutza eta azken belaunaldiko teknologia eskuratzen lagundu nahi zaie, azpiegitura eta zerbitzu sarea sortuz. Enpresek ekoizpen prozesuetan inbertsio handiak egin aurretik teknologiak ebaluatu ahal izateko ingurunea izango dute. Bitartean, ekosistemako eragileen artean sinergiak sortuko dira, hondakin plastikoen kudeaketaren eraginkortasuna hobetzeko eta materialen ekonomia zirkular eraginkorra lortzeko soluzio teknologikoak garatzeko.

Ekimena CDTIk (Industriako Garapen Teknologikorako Zentroa) finantzatzen du Berrikuntza Ekosistemak Programaren barruan, eta hauek ere parte hartzen dute: VALORIZA Servicios Medioambientales enpresak, Plastiko Birziklatzaileen Elkarte Nazionalak (ANARPLA), Basque Environment Clusterrak (ACLIMA) eta GAIKER, AIMPLAS eta CIDAUT zentro teknologikoek.

Elkarlanerako gunean parte hartzeko informazio gehiago: https://ciclicom.com/#contacto

Bereizketa adimendunaren eta birziklatze kimikoaren bitartez hondakin plastikoetatik lehengai zirkularrak lortzeko BIRPLAST proiektua amaitu da

Aurten BIRPLAST proiektua amaitu da; bertan, Basque Research & Technology Alliance (BRTA) elkarteko kidea den GAIKERek parte hartu du, Euskadiko Zientzia Teknologiko eta Berrikuntza Sareko beste hiru eragilerekin batera. Sener ingeniaritza eta teknologia taldeak gidatutako ikerketa horri esker, hamar enpresak hondakin plastikoak bereizteko eta birziklatzeko teknologia berrien I+Ga egin dute, kalitate handiko lehengai zirkularrak ekoizteko.

BIRPLAST 2022an sortu zen, eko-industrian hainbat hondakin plastiko konplexu birziklatzeko prozesu hobetuak garatzeko ezagutzak sortzeko helburuarekin. Korronte horiek, batez ere, beste hondakin batzuk tratatzean sortzen dira, hala nola ontzi arinak, erabiltzen ez diren ibilgailuak (VFU) edo gailu elektriko eta elektronikoak (GEEH), gaur egun baliabide eta lehengai horiek ezin direlako guztiz aprobetxatu.

Banaketa aurreratuarekin lotutako emaitzak oso onak izan dira proiektuaren amaieran. Ontzi arinen hondakinen kasuan, materialak sailkatzeko etapa hobetu da, birziklagarritasun mugatua duten eta errefusatu behar diren plastikoen konposizioa egokitzeko, teknika espektroskopikoak eta ikaskuntza automatikoan ("machine learning") oinarritutako datuen analisia erabiliz. Automobilak zatikatzean sortzen diren metal-hondarretatik plastiko abarrak aprobetxatzeko ere lan egin da, bereizketa adimendun tekniken bidez.

Hondakinen birziklapen kimikoari dagokionez, pirolisi prozesu berriak garatu dira. Horietako bat plastiko nahasteak tratatzeko erabiltzen da: sortutako argizariak berriro prozesatu egiten dira, produktu arinagoak eta baliotsuagoak lortzeko, eta, aldi berean, kloro edukia murrizteko. Bestea, plastikoak biomasarekin prozesatzeko erabiltzen da, horrela, halogeno eduki txikia duten olioak lortzeko. Era berean, autoen zatiketan sortutako poliesterrak eta poliuretano-aparrak birziklatzeko solbolisi prozesu berriak ere garatu dira. Halaber, mota ezberdinetako eta hezetasun maila ezberdinetako hondakinei egokitutako gasifikazio-prozesuak ere, ohantze fluidizatuko ("fludised bed") eta ohantze lainoztatuko ("jet spouted bed") erreaktoreak erabiliz sintesi-gasa lortzeko eta arazteko. Azkenik, modu osagarrian, pirolisi- eta gasifikazio-prozesuetan sortutako urak nola tratatu zehaztu da, eta pirolisi-olioak zura babesteko nola erabili.

Gainera, emaitza bakoitzak (bereizketa adimendun prozesuak edo monomeroak, solbolisi eta pirolisi bidez lortutako produktu kimikoak edo olioak), zein ekoizpen-eraginkortasuna duen eta ekonomia zirkularrean nola laguntzen duen neurtu egin da. Eta ingurumen ebaluazioa osatzeko, gaur egun aprobetxatzen ez diren hondakin plastikoen kudeaketarekin konparatuz lehengai zirkular horiek sortzeak dakarren hobekuntza ere zehaztu da.

BIRPLAST HAZITEK 2022 programaren finantzaketa jaso duen (Esp. ZE-2022/00022) industria-ikerketarako proiektu estrategikoa da eta hasieran zehaztutako helburuak lortu ditu. HAZITEK Eusko Jaurlaritzako Ekonomiaren Garapen, Jasangarritasun eta Ingurumen Sailaren programa da, enpresetan I+G bultzatzeko.