Bioplastics4health SL enpresaren % 100 konpostagarriak diren film eta ontzien soluzio berritzailea GAIKERen laguntza teknologikoarekin garatu da
Hondakin plastiko fosilen aurreko ingurumen erronka gero eta handiagoa da, eta Bioplastics4health SL (B4H) enpresak irtenbide berritzailea aurkeztu du: % 100 konpostagarriak diren eta patata-almidoitik eratorritako biopolimero batekin (PHBV) egindako film eta ontziak. GAIKER zentro teknologikoaren laguntzarekin garatutako teknologia esklusiboan oinarritzen da, Alemanian hasiko da ekoizten, eta hortik Euskal Autonomia Erkidegora zabaltzeko planak daude. Bertan, B4Hk ekonomia zirkularrarentzat funtsezkoa den material konpostagarri horretarako Europan dagoen gaitasun industrialaren faltari aurre egingo dio.
Plastics Europe erakundearen datuen (2024) arabera, munduan ekoitzitako 400 milioi tona plastikoetatik % 0,6 baino ez dira bioplastikoak. 2029an ekoizpena 7,7 milioi tonara heltzea espero da (% 14ko urteko tasa), Erabilera bakarreko plastikoen EBeko zuzentaraua bezalako erregulazioek eta ontzi jasangarrien eskakizunak bultzatuta. PHBV materiala "home" konpostagarritasuna izateagatik nabarmentzen da, PLA bezalako alternatiba "industrialen" aurrean, eta gainera erresistentzia termiko hobea eta ingurumeneko eragin txikiagoa ditu.
B4Hk 700 k€ko hasierako inbertsioa egin du eta B2B eredua du, hasieran 2.840 tona produzitu ahal izango du urtero eta 5 urtean 10,3 milioi euro fakturatzea espero du, hazten ari den Europako merkatu baten atal bat hartuko baitu. Enpresa 2. fasean dago eta Espainian lantegi bat jartzeko finantzaketa publiko-pribatua bilatzen hasi da, EBko jasangarritasunerako araudiekin bat etortzeko eta Espainian eta Europan nekazaritzako elikagaiak hornitzeko.
Lehen txanda horretako inbertitzaileen artean, TranXforma Food, S.L. enpresa "lead investor" da, eta ondoren, Iñaki Andradas sukaldaria buru dituen RAISA Film de Polietileno, S.A. inbertsio-taldea eta GAIKER Zentro Teknologikoa daude. Nekazaritzako elikagaien sektoreko inbertitzaile txiki talde bat ere sartu da kapitalean, ohar bihurgarri baten bidez. B4Hk 180 k€ko mailegua jaso du ENISAren Agroinnpulso programatik eta Bizkaiko Foru Aldundiaren eta Eusko Jaurlaritzaren Enpresa Garapenerako Euskal Agentziaren (SPRI) dirulaguntzak ere jaso ditu.
